წარმომადგენლობითი საბჭოს სხდომა N2
დღის წესრიგი:
1. წარმომადგენლობითი საბჭოს შემადგენლობაში ცვლილებების შეტანის შესახებ.
(მომხსენებელი ცენტრალური საარჩევნო კომისიის წევრი მედეა წეროძე);
2. სტუ-ს ხარისხის უზრუნველყოფის სამსახურის ხელმძღვანელის კანდიდატურის დამტკიცება.
(მომხსენებელი ცენტრალური საარჩევნო კომისიის წევრი მედეა წეროძე);
3. სტუ-ს წარმომადგენლობითი საბჭოს რეგლამენტის შემმუშავებელი კომისიის წევრების დასახელება და სამუშაო ჯგუფის დამტკიცება;
4. მიმდინარე საკითხები.
წარმომადგენლობითი საბჭოს სხდომა N2 სხდომა ჩატარდება
2007 წლის 17 იანვარს, 11 საათზე
სტუ-ს ადმინისტრაციული კორპუსის მცირე სააქტო დარბაზში
საქართველოს ტექნიკური უნივერსიტეტის წარმომადგენლობითი საბჭოს 2007 წლის 17 იანვრის სხდომის
ოქმი ¹2
წარმომადგენლობითი საბჭოს სხდომას მისი სიითი შემადგენლობის 77 წევრიდან ესწრებოდა 74 წევრი. სხდომას უძღვებოდა სტუ-ს წარმომადგენლობითი საბჭოს სპიკერი პროფ. ეკატერინე თევზაძე.
სხდომამ მოისმინა პროფ. ე. თევზაძის მიერ წარმოდგენილი დღის წესრიგი (იხ. დანართი), რომელსაც საბჭომ ერთხმად დაუჭირა მხარი. რადგან საბჭოს სამდივნო დამტკიცებული არ არის, საჭირო გახდა მდივნის არჩევა. საბჭომ სხდომის მდივნად ერთხმად აირჩია სტუ-ს ასოცირებული პროფესორი გინა გურეშიძე.
სხდომის თავმჯდომარემ დღის წესრიგის თანახმად სიტყვა გადასცა ცენტრალური საარჩევნო კომისიის წევრს მედეა წეროძეს.
მოისმინეს: ცენტრალური საარჩევნო კომისიის წევრის მედეა წეროძის ინფორმაცია სტუ-ს წარმომადგენლობითი საბჭოს შემადგენლობაში ცვლილებების შეტანის შესახებ და მარნეულის ფაკულტეტის წარმომადგენლობითი საბჭოს ორ წევრზე კონკურსის გამოცხდების შესახებ (მოხსენებითი ბარათი ოქმს თან ერთვის).
ჩატარდა კენჭისყრა და დამტკიცდა ახალი წევრების უფლებამოსილება.
მოისმინეს: პროფ. ე. თევზაძის ინფორმაცია იმის შესახებ, რომ სტუ-ს აკადემიურმა საბჭომ, 2007 წლის 11 იანვრის სხდომაზე ფარული კენჭისყრით ხარისხის უზრუნველყოფის სამსახურის ხელმძღვანელად აირჩია პროფ. სერგო ესაძე. ამასთან დაკავშირებით, სპიკერმა სიტყვა გადასცა ცენტრალური საარჩევნო კომისიის წევრს მ. წეროძეს.
მ. წეროძემ სხდომის წევრებს გააცნო აკადემიურ საბჭოში ჩატარებული არჩევნების შემაჯამებელ ოქმი (იხ. დანართი).
სპიკერმა ე. თევზაძემ აღნიშნა, რომ განათლების კანონში არ არის მითითებული თუ რა ფორმით, (ღია თუ ფარული კენჭისყრით) უნდა ჩატარდეს წარმომადგენლობით საბჭოში ხარისხის უზრუნველყოფის სამსახურის ხელმძღვანელის არჩევა.Aამიტომ,Mმან კენჭისყრაზე დააყენა საკითხი თუ რა ფორმით უნდა ჩატარდეს ხარისხის უზრუნველყოფის სამსახურის ხელმძღვანელის არჩევა.
წარმომადგენლობითი საბჭოს წევრებმა ღია კენჭისყრით ერთხმად დაუჭირეს მხარი ღია კენჭისყრის ფორმას.
ჩატარდა ღია კენჭისყრა და ხარისხის უზრუნველყოფის სამსახურის ხელმძღვანელის თანამდებობაზე ხმათა უმრავლესობით არჩეულ იქნა პროფ. სერგო ესაძე.
პროფ. ს. ესაძემ წარმოადგინა თავისი პროგრამა. ჩამოაყალიბა ხარისხის უზრუნველყოფის სამსახურის მნიშვნელობა და მისი დანიშნულება, მიზნები; რის შემდეგაც სხდომის წევრებმა გამოთქვეს აზრი:
კითხვას სვამს პროფ. ნოდარ ქაჯაია _ ორი წლის განმავლობაში ყველა პროცესი ვითარდებოდა ვოლუნტარისტულად, ყველა საკითხს წყვეტდა ადამიანთა მცირე ჯგუფი, რასაც მოჰყვა სასწავლო პროცესის გაუარესება.
კითხვას პასუხობს პროფ. სერგო ესაძე – პიროვნულად აღარ მოხდება გადაწყვეტილებების მიღება. აუცილებლად მოვისმენთ და გავითვალისწინებთ სპეციალისტთა მოსაზრებებსა და რეკომენდაციებს.
კითხვას სვამს პროფ. დავით ჯაფარიძე – სასწავლო პროგრამებს როგორ გაუკეთებთ ანალიზს?
კითხვას პასუხობს პროფ. სერგო ესაძე - II, III, IV, V კურსები სწავლობენ 120 კრედიატიანი პროგრამით. აკრედიტაციის გაუვლელობის ერთ-ერთი მიზეზი სწორედ ეს იყო. ამასთან დაკავშირებით შეიქმნა დროებითი სააკრედიტაციო საბჭო, რომელიც მუშაობს ამ საკითხზე. ეს არის პროგრამული მიმართულება. ამ ჯგუფმა 15 თებერვლამდე უნდა მოამზადოს 60 კრედიტის შესაბამისი პროგრამები. 20 იანვრიდან დეკანები წარმოადგენენ ამ პროგრამებს. ყველა ეს პროგრამა იქნება 60 კრედიტიანი.
კითხვას სვამს პროფ. ვანო თვალავაძე – ყველა ის ფუნქცია, რაც თქვენი გეგმით ჩამოთვალეთ, ჰქონდა აკადემიური განვითარების დეპარტამენტს. თქვენი სამსახურის პარალელურად იმუშავებს თუ არა ეს დეპარტამენტი?
კითხვას პასუხობს პროფ. სერგო ესაძე – ხარისხის უზრუნველყოფის სამსახური შეიქმნა სწორედ ამ დეპარტამენტის რეორგანიზაციის გზით, დეპარტამენტის ნაცვლად იქნება მინიმალური სამსახური, რომელსაც ექნება რაღაც ფუნქციები, მაგრამ შემცირებული, შეკვეცილი ფორმით.
კითხვას სვამს პროფ. იგორ კვესელავა – კანონში მართვაზე არაფერი წერია, სასწავლო პროცესი უნდა იმართებოდეს. აქ ლაპარაკია შეფასებაზე, მართვა არ ჩანს. ჩვენ უნდა გვქონდეს წესდება, ეს იქნებ იმას ნიშნავს, რომ ვრჩებით ძველ წესდებაზე? უნდა შეიქმნას ინსტრუქცია, რომელიც ხელში აიღებს ყველაფრის მართვას.
კითხვას პასუხობს პროფ. სერგო ესაძე – ამ სამსახურის მუშაობას განსაზღვრავენ ფაკულტეტები, რაც შეეხება უნივერსიტეტის აკადემიური პროცესის კოორდინაციას, გავაკეთებთ ჩვენ, დანარჩენს ფაკულტეტები გააკეთებენ.
კითხვა-პასუხის შემდეგ აზრი გამოთქვა სტუ-ს წარმომადგენლობითი საბჭოს რამდენიმე წევრმა:
პროფ. ნოდარ ქაჯაია – ჩვენ უნდა შევცვალოთ რაღაც, თორემ ასე აღარ შეიძლება. სირცხვილია, რომ ასეთი ტრადიციების უნივერსიტეტმა აკრედიატაცია ვერ მიიღო. რას ნიშნავს შენობების გასხვისება, შახტის გაუქმება? წარმოუდგენელია სასწავლო პროცესი მიმდინარეობდეს ნორმალურად, როცა სასწავლო პროცესის 35% მიყავს შტატიან თანამშრომლებს, დანარჩენი საათობრივებს. სრული პროფესორის ანაზღაურება გაცილებით ნაკლებია, ვიდრე ივ ჯავახიშვილის სახელობის თბილისის სახელმწიფო უნივერსიტეტის ასისტენტ-პროფესორისა. სწავლების 2/3 მიყავს საათობრივებს, თანაც დამსახურებულ და მაღალი აკადემიური კვალიფიკაციის მასწავლებლებს, ეს უსამართლობაა. მათ უნდა მივცეთ ხელშეკრულება შტატით.
პროფ. იგორ კვესელავა – სასწავლო პროცესი არის მთავარი. უნდა მოევლოს მაგისტრების საკითხსაც. ჩვენ ვაძლევთ ხარისხს. როგორ შეიძლება ნაშრომი იყოს 10-15 გვერდზე? ლიცენზიის გარეშე მაგისტრატურა არ უნდა არსებობდეს. აუცილებლად დავაყენოთ დოქტურანტურის საკითხი. უნდა დავსვათ საკითხი, რომ მივიღოთ პოლიტიკური განცხადება, სად წავიდეს მომავალი მშენებელი, გეოლოგი, ნებისმიერი ინჟინერი? ფასიანი კერძო ინსტიტუტები ქმნიან მძლავრ მატერიალურ ბაზას და პროფესურას. ეს განპირობებულია იქ მაღალი ხელფასით. ჩვენი უნივერსიტეტი ამით კარგავს პროფესიონალებს.
სტუდენტური თვითმმართველობის წარმომადგენელი ბორის გითოლენდია – ჩვენი მთავარი თხოვნა და მოთხოვნაა, რომ სტუდენტები ჩართული ვიყოთ ამ პროცესში. ბატონ ს. ესაძესთან მიმართებაში ჩვენ მზად ვართ თანამშრომლობისა და გვერდზე დგომისათვის.
შეკითხვების შემდეგ პროფ. ე. თევზაძემ ჩაატარა ღია კენჭისყრა.
სპიკერმა კითხვით მიმართა სხდომის წევრებს:
ვინ არის მომხრე, რომ სტუ-ს ხარისხის უზრუნველყოფის სამსახურის ხელმძღვანელად დამტკიცებული იქნეს პროფ. ს. ესაძე? გთხოვთ, ხელის აწევით დაადასტუროთ.
წინააღმდეგი ხომ არავინ არის? – ასეთები არ არიან.
თავი ვინ შეიკავა? – ასეთები არ არიან.
გადაწყვეტილება მიღებულ იქნა ერთხმად, გმადლობთ.
დაადგინეს: სტუ-ს ხარისხის უზრუნველყოფის სამსახურის ხელმძღვანელად არჩეულ იქნა პროფ ს. ესაძე.
მოისმინეს: პროფ. ე. თევზაძის ინფორმაცია დღის წესრიგის მე-3 საკითხის შესახებ - რეგლამენტი, რომელიც უახლოეს პერიოდში უნდა დამტკიცდეს, აუცილებლად გაითვალისწინებს საბჭოს შემადგენლობაში სამუშაო ჯგუფის ჩამოყალიბებას. აქედან გამომდინარე, აკადემიური საბჭოს თავმჯდომარესთან კონსულტაციების შედეგად მივედით იმ დასკვნამდე, რომ ჩვენს საბჭოში მიზანშეწონილია ჩამოყალიბდეს ოთხი სამუშაო ჯგუფი (იხ. დანართი).
სპიკერმა კითხვით მიმართა სხდომის წევრებს:
მე კენჭს ვუყრი სამუშაო ჯგუფების დასახელებასა და მათი შემადგენლობის დამტკიცებას, ვინ არის მომხრე? გთხოვთ ხელის აწევით დაგვიდასტუროთ.
წინააღმდეგი ხომ არავინ არის? – ასეთები არ არიან.
თავი ვინ შეიკავა? – ასეთები არ არიან.
გადაწყვეტილება მიღებულ იქნა ერთხმად, გმადლობთ.
პროფ. ე. თევზაძემ წარმომადგენლობითი საბჭოს წევრებს აუწყა, რომ დღის წესრიგით გათვალისწინებული საკითხები ამოიწურა, საბჭოს წევრებს მადლობა გადაუხადა მონაწილეობისათვის და სხდომა დახურულად გამოაცხადდა.
წარმომადგენლობითი საბჭოს სპიკერი
პროფესორი /ე. თევზაძე/
მდივანი ასოცირებული პროფესორი /გ. გურეშიძე/
| 
